|
Als 1. avrigl 1976 es gnida fundeda a Zuoz l’intrapraisa Rufinatscha SA. La spüerta da Victor Rufinatscha, chi ho absolt la furmaziun da tapezier-decoratur, cumpiglia daspö quel di tuot las spartas da la decoraziun interna: la cusgliaziun cumpetenta sül sectur da fuonz da lain, linoleum u tapet scu er l’execuziun da la lavur, üna granda tscherna da stoffas per tendas u per intents da decoraziun, l’elavuraziun professiunela da mobiglia veglia plümatscheda, der cussagls cu cha’s po creer ün bel ambiaint d’abiter e staunzas cun ün’atmosfera prüveda scu eir lavuors da seller. La cliantella da l’intrapraisa s’extenda sur tuot l’Engiadina e la Val Müstair.
L’an 1996, quasi scu regal pel giubileum da 20 ans da l’intrapraisa, es eir auncha gnida s-chaffida la Butietta d’art „ La Laterna“. Cun que s’ho accumplieu il giavüsch fervent da Victor Rufinatscha da pudair metter a dispusiziun üna plattafuorma a sia paschiun per la pittüra. In las localiteds da la gallaria sun expostas permanentamaing las ouvras da differents artists, ed in ufficina vegnan creos rams da purtrets e passepartouts. Victor Rufinatscha s’ho acquisto las cugnuschentschas necessarias per fer rams tar specialists cuntschaints ed es dvanto svess ün cusglieder cumpetent chi’d es eir capabel da realiser giavüschs individuels da sia cliantella. El svess creescha eir rams da purtrets fich artistics e da taimpra originela tenor sias egnas ideas. S’inclegia cha’l cliaint ho eir la pussibilted da lascher inramer sieu purtret suot vaider antireflex u vaider da museum per eliminer uschè ils effets disturbants da lampas u da la glüsch dal di sül purtret.
In la gallaria po l’amih da l’art contempler in tuotta pêsch l’exposiziun da purtrets d’artists varios chi vain adüna darcheu müdeda, mediter l’effet da las pittüras ed eir sföglier da gust in quellas mappas chi cuntegnan numerus fögls da differents artists. Ultra dals originels e las litografias numeredas as chatta eir üna granda quantited da serigrafias, gravüras u fotografias. Fich remarchabla es in prüma lingia la granda collecziun da pittüras originelas da l’artist zuozingher Gian Casty chi s’ho fat ün nom surtuot scu creatur da vitraglias e fnestras da baselgia. Il pittur indigen vaiva creo a sieu temp ün placat da reclama fich originel per Zuoz scu destinaziun da vacanzas, e quist placat es uossa turno a sieu lö d’origin e po gnir admiro dals visitaduors da la gallaria „La Laterna“.
|